Veksthuset for livsvitskap er innovasjonseininga for livsvitskap, helse og teknologi ved Universitetet i Oslo (UiO).
Meld deg på neste innovasjonsmøteplass for akademia og næringsliv 10. november
Tema: Helseteknologi
Inspirasjonsinnlegg: Bård Eker, Eker Group, norsk industridesignar, entreprenør og innovatør
Rollemodellinnlegg: Kim Lien, grunnleggar & CEO Nordic Neurotech AS og Imac Zambrana, CSO Nordic Neurotech AS og førsteamanuensis, Universitetet i Oslo
Matchmaking mellom forskarar og studentar og medlemsbedrifter hos medarrangøren vår Norway Health Tech blant anna MedLytic, DNV Imatis, HoloCare, EpiGuard, Nordic Neurotech og Medistim.
Med denne møteplassen ønsker vi å inspirere, gje sjølvtillit og kunnskap om innovasjonsprosessar og legge til rette for samarbeid som gjer at forsking blir teken i bruk og kjem pasientar og samfunnet til gode.
Sjå programmet, og meld deg på!
Påmeldingsfrist: 7. november
Innovasjonskultur ved UiO: Farmasistudentar inntar Forskingsparken
Studentforeininga for farmasøytisk innovasjon, ShareLab i Forskingsparken og Veksthuset for livsvitskap, helse og teknologi har gått saman om eit prosjekt som gjer det mogleg for farmasistudentar å jobbe på innovative prosjekt og skaffe seg kompetanse næringslivet spør etter. Dette er første steg på vegen mot å involvere heile innovasjonsøkosystemet i Forskingsparken i Veksthuset sitt arbeid med studentinnovasjon.
Nye ansikt i Veksthus-teamet
Beate Rygg Johnsen, senior innovasjonsrådgivar
Beate har utdanning innan biokjemi frå UiO og har lang erfaring frå global industri. Ho har jobba innan bioteknologisk og farmasøytisk industri og oppstartsselskap med forretningsstrategi, innovasjon og kommersialiseringsprosessen. Hennar store motivasjon er å bringe noko av denne forretningskunnskapen inn i akademia og å fremme innovasjon og kreativ tenking.
Katja Mjøs, senior innovasjonsrådgivar, PhD
Som utdanna kjemikar veit Katja kva som skal til for å lage bindingar mellom partar («atom») for å skape noko større («molekyl»), som kan trenge litt ekstra energi i form av ein katalysator. Katja ser fram til å hjelpe UiO sine forskarar og studentar med å modne idéane sine og, som innovasjonskatalysator, bygge stabile forbindelsar mellom universitetet og industripartnarar, gründerar, inkubatorar, myndigheiter og ikkje-offentlege organisasjonar. Etter 12,5 år på den canadiske vestkysten, der ho fullførte doktorgraden sin i medisinsk kjemi ved University of British Columbia (UBC) og jobba på UBC sitt teknologioverføringskontor, er Katja og familien hennar glade for å vere tilbake i Noreg!
Peder Heyerdahl Utne, juridisk rådgivar deltid
Peder har mange års erfaring frå juridisk rådgiving innan offentleg og privat samarbeid med spesielt fokus på kontraktstyring, regulering av immatrielle rettar, etikk og regelverk. Han har hovudstillinga si ved Kreftklinikken, Oslo universitetssjukehus.
Katrine L. Stensløkken, administrativ koordinator
Katrine har ein cand.scient.-grad i biologi frå UiO. Ho har lang erfaring innan fleire administrasjonsfelt på UiO samt god kjennskap til gjeldande reglar og retningslinjer ved UiO spesielt og lovverk i universitets- og høgskulesektoren generelt.
Veksthuset på Nordic Life Science Days
I september deltok Veksthuset på Nordic Life Science Days (NLSDays) i Malmö. NLSDays er ein arena for å knyte kontakt med både offentlege og private livsvitskapsaktørar i Norden og finne samarbeidspartnarar for både Veksthuset, forskarar og studentar. Veksthuset var vertskap for standen Norway for Life Science saman med ei rekke andre aktørar i innovasjonsøkosystemet frå Oslo med Oslo Cancer Cluster i spissen. På bildet er teamet i Veksthuset ved Øresundsbrua: Norunn K. Torheim, Ivar Bergland, Beate Rygg Johnsen, Nicolay Bérard-Andersen og Katja Mjøs.
Påminning: Internship for studentar 2023 – bedrifter kan registrere seg
Bedrifter som ønskjer å tilby sommarjobb gjennom internship-programmet som er støtta av Veksthuset for livsvitskap, helse og teknologi, kan registrere seg for å bli med i 2023. Bedrifter kan sjølv finansiere så mange stillingar dei ønskjer. Veksthuset dekker 50 prosent av lønna av 20 stillingar i små- og mellomstore bedrifter. Du søkjer om lønnsstøtte når du registrerer bedrifta di. Her er det førstemann til mølla!
Kontakt oss!
Vi byr på skreddarsydd rettleiing og støtte, inkludert såkornmidlar. Ta kontakt med oss dersom du vil diskutere korleis du kan gå vidare med tidlegfaseidéen din.