Veksthuset for verdiskaping – UiO si innovasjonseining for livsvitskap, helse og teknologi.
Meld deg på innovasjonsmøteplass for akademia og næringsliv 9. november
Tid og stad: kl. 17–20, Forum auditorium, Forskingsparken, Gaustadalleen 21
Inspirasjonsinnlegg: Elen Høeg, dagleg leiar, Health2B
Rollemodellinnlegg: Gard Fostad Moe, dagleg leiar, Aristeia AS
Matchmaking mellom forskarar og studentar og bedrifter som er medlemmar hos medarrangørane våre den opne innovasjonsarenaen Health2B og helseklynga Norway Health Tech blant anna Aristeia, FornixVR og Patentstyret.
Med denne møteplassen ønsker vi å inspirere, gje sjølvtillit og kunnskap om innovasjonsprosessar og legge til rette for samarbeid som gjer at forsking blir teken i bruk og kjem pasientar og samfunnet til gode.
Sjå programmet, og meld deg på!
Påmeldingsfrist: 6. november
Kunnskap i bruk: 5 millionar i støtte til innovative UiO-forskarar
Rekordmange 63 søknader kom inn då UiO lyste ut innovasjonsmidlar i år. 23 prosjekt får no midlar frå rektoratet til å utvikle samfunnsnyttige løysingar. Veksthuset for verdiskaping har hatt ansvar for utlysinga og evalueringsprosessen. Vi gratulerer alle forskingsgruppene med tildelinga!
Innovasjonskonferansen Science Impact i bilde
Sjå video med bilde av alle som var på scena (1 minutt og 51 sekund med musikk).
På innovasjonskonferansen Science Impact 2023 – tomorrow's solutions start today i Forskingsparken 27. september under Oslo Innovation Week zooma vi inn på hjernet, hjartet og kroppen og planeten si helse og dykka ned i energiproduksjon (vind og sol) og energilagring (batteri og hydrogen) for å gi deltakarane framifrå forsking og utvikling frå Universitetet i Oslo, Oslo universitetssjukehus, SINTEF, oppstartsbedrifter i innovasjonsøkosystemet i Oslo og bedrifter.
Vi tok tak i utfordringar og løysingar og spurte: Korleis utviklar vi løysingar for å sikre ei berekraftig helseteneste som vil ha færre ressursar i framtida? Korleis unngår vi å bli sjuke i utgangspunktet? Korleis utviklar vi løysingar for eit berekraftig energisystem? Korleis kan teknologi bidra til nye løysingar? Korleis bør akademia og næringsliv samarbeide for å auke samfunnsnytta av forskinga?
Ein stor takk til alle som bidrog på og bak scena og til alle deltakarane som tok aktivt del i nettverksbygging og gjorde dette til ein bra dag for alle – vi håpar å sjå dykk igjen på Science Impact 2024!
Hovudarrangør: Veksthuset for verdiskaping, UiO
Eksterne partnarar: Inven2, Forskingsparken, SINTEF, LMI, Oslo universitetssjukehus (OUS) og The Life Science Cluster
Interne partnarar ved Universitetet i Oslo (UiO): UiO:Energi og miljø, dScience – Senter for data- og berekningsvitskap, Senter for global helse ved SUSTAINIT, Det medisinske fakultet, Det matematisk-naturvitskaplege fakultet, Institutt for biovitskap og Det utdanningsvitskaplege fakultet
Studentinnovasjon
Sommarinternship for studentar 2024: No kan bedrifter registrere seg
Bedrifter som ønsker å tilby sommarjobb gjennom internship-programmet som blir støtta av Veksthuset for verdiskaping, kan no registrere seg for å bli med i 2024. Vi håper å tilby så mange studentar som mogleg sommarjobb gjennom programmet. Bedrifter er, uavhengig av størrelse, velkomne til å finansiere eit uavgrensa antal sommarjobbar. Veksthuset dekker 50 prosent av lønna av 20 stillingar i små- og mellomstore bedrifter. Du søker om støtte når du registrerer firmaet. Her er det førstemann til mølla!
Målet med internship-programmet er å gjere studentar kjent med ulike karrierevegar der dei kan bruke kunnskapen og kompetansen sin. Studentinnovasjonsforeiningar ved Det medisinske fakultet og Det matematisk-naturvitskaplege fakultet driftar programmet, og studentar frå dei to fakulteta samt Det utdanningsvitskaplege fakultet, kan delta. Tilbakemeldingane frå både studentar og bedrifter som har delteke så langt, har vore overstrøymande positive.
Innovasjonsdag for farmasistudentar
Veksthuset for verdiskaping var med og fasiliterte då Farmasøytisk institutt arrangerte innovasjonsdag i Forskingsparken for studentane sine. Målet var å gi studentane innsikt i alle aspekt innan berekraftig utvikling av legemiddel og ei god forståing av heile prosessen frå ide til produkt. Innovasjonsrådgivar i Veksthuset Nicolay Bérard-Andersen hadde innleiing om innovasjon medan innovasjonsrådgivar Beate Rygg Johnsen hadde ein workshop om design thinking. Veksthuset hadde òg invitert helseinkubatoren Aleap med for å snakke om kor viktig rolle farmasøytane har i prosessen med legemiddelutvikling, både i store legemiddelfirma og i små start-up-bedrifter.
Søk SEFiO om støtte til studentinnovasjonsprosjekt
Gjennom Veksthuset for verdiskaping er Universitetet i Oslo ein av partnarane i Studentenes Entreprenørskapsfond i Oslo (SEFiO). Her kan studentar søke om opp til 25 000 kroner til innovasjonsprosjekt. Målet er å bygge eit unikt innovasjonsmiljø i Oslo og knytte akademia, næringsliv og studentar tettare saman. SEFiO er eit samarbeid mellom UiO, BI, OsloMet, NMBU og Kristiania. Innovasjonsrådgivar i Veksthuset for verdiskaping Nicolay Bérard-Andersen deltok i paneldiskusjonen på lanseringa av SEFiO under Oslo Innovation Week. Der stakk UiO-prosjektet Awareable av med sigeren under pitchekonkurransen. Prosjektet utviklar løysingar som skal førebygge ulykker på anleggsplassar ved å kombinere bildegjenkjenning, sensorar og behandling av data nær kjelda.
Kontakt oss om du har ein innovasjonsidé i tidleg fase!
Vi byr på skreddarsydd rettleiing og støtte, inkludert såkornmidlar på inntil 200 000 kroner. Ta kontakt med oss dersom du vil diskutere korleis du kan gå vidare med innovasjonsidéen din i tidleg fase.